English | عربی | Kurdî دواهەواڵ
ڕاستەوخۆ  
 
٦ ێ چریا ئێکێ ، رۆژا بھێزکرنەڤا باوەریێ
2020-10-09 [12:13 PM]

نڤیسینا : غیاس خالد زێباری


لێ بارزانی وەکی رێبەرێ گەلێ کورد و سمبۆلێ ئازادیێ و رزگاریێ زانی یە ، ئەڤەژی بۆ وێ دادوەری و وەکھەڤیێ ڤەدگەرێتەڤە ئەوا بارزانی نەمر لسەردەمێ خۆ کرینە کریار و جوداھیێن چینایەتی نەھێلای و ھەمی ژیانا خۆ بۆ بەختەوەریا گەلێ خۆ و رزگاریا کوردستانێ تەرخان کری ، ئەڤ ڕەفتار و سەرەدەریێن بارزانی نەمر ژی بەردەوامیدنا وان بنەمایێن رێبازا بارزانی بوون ئەوێن لسەر دەستێ باپیرێ وی یێ مەزن شێخ عبد اللە بارزانی دەسپێکری و رێبەرێن دیترێن ماڵباتێ بەردەوامی پێ دا ل شێخ عبد السلامێ ئێکێ و شێخ محمد و شێخ عبد السلامێ دوویێ و شێخ ئەحمەدی.
زۆر سەرکردە ل جیھانێ ھەنە بڤی رەنگی پێشوازیێ لێ ھاتیە کرن ، جوداھیا ئەوا ل بارزانی نەمر ھاتیە کرن دگەل وان ئەوە، خەلکێ نەتەوێن دیتر باوەری پێ دایە و پشتی وەغەرا وی ژی خەلک بەردەوام باوەریێ ددەتەڤێ و مۆکۆمتر دبیت .  
ئەڤەژی دیار دکەت کۆ بارزانی نەمر و رێبازا بارزانی جھێ خۆ دناڤ مرۆڤایەتیێ دا کریە و دگەل ھەست و دەروونێ خەلکێ کوردستانێ دا دژیت ، ژلایەکێ دیتر بەڵگەنە کۆ رێبازا بارزانی رێکا ئازادی و رزگاری و بەختەوەریا خەلکێ کوردستانێ یە بەرەڤ بدەست ڤەئینانا ماف و ئارمانجێن نەتەوی و نشتیمانی و جڤاکی و چەسپاندنا دادوەریێ و دادوەریا جڤاکی و ئاڤاکرنا جڤاکەکێ ساخلەم دوور ل ڕک و کین و دووبەرەکیێ ،  پێکڤە ژیانا ھەمی پێکھاتێن ئایینی و نەتەوی و جوداھیێن چینایەتی دابین کریە . 

لەوما گرنگە بۆ ئەڤرۆ و داھاتی ژی دەسھەلاتداریا کوردستانێ ڤان ھەلکەفت و بیرەوەریان گرنگ ببینیت و بکەنە فاکتەر بۆ چارەسەرکرنا پرسێن سیاسی و حزبابەتی و کارگێری و دارایی ل کوردستانێ ، کۆ نھۆ ل کوردستانێ سەرھەلداینە و بەرەڤ گەشەبوونێ دچن ..! ھەر وەسا ژبووی موکۆمکرنا باوەریا خەلکێ کوردستانێ ب دەسھەلاتداریا خۆ و کێمکرنا وێ ڤالاھیا دناڤبەرا خەلکی دەسھەلاتێ دا چێبوو ژ ئەنجامێ سەرەدەریەکا نەساخلەم و کارگێریەکا چەندین سالی یا پڕی نەدادوەری و گەندەڵی کۆ زیانەکا ھەرە زۆر گەھاندی یە بزاڤا رزگاریخوازیا کوردستانی و پرسا کوردستانی ب گشتی ، ھەر وەسا لاوازکرنا ھەستا نەتەوی و پابەندیێن نشتیمانی ژلایێ تاکێ کوردستانی و دابەشبوونا جڤاکێ کوردستانی لسەر دوو چینا ، چینا سەردەست و چینا ژێر دەست ، یان ھەژارێ ھەژار یان ژی زەنگینێ زەنگین ..! 

ھەڤڕکی و بەرێکانێ لسەر پێشکیشکرنا باشترین خزمەت و پلان بۆ بھێزکرنا قەوارێ ھەرێما کوردستانێ و دەسکەفتێن ھەیی و پاشەرۆژەکا گەشتر . 
بەردەوامیا ڤان ھەڤڕکیێن سیاسی و حزبایەتی ئەوێن دبنە ئەگەرێ گۆڕینا شیرازێ جڤاکێ کوردستانێ ، مەترسیێ لسەر قەوارێ ھەرێمێ و پاشەرۆژا وێ درۆست دکەن ، کۆ گەھشتیە وی ئاستێ ھندەک کەس و لایەنێن سیاسی پەنایێ بۆ عیراقێ و وەلاتێن داگیرکەر دبەن دژی ھەرێما کوردستانێ و حکومەتا وێ ، یان دژی ھەر پرۆژە و بریارەکا حکومەتا ھەرێمێ رادوستن ئەگەر چەند د خزمەتا بەرژەوەندا گشتی ژی دا بیت ...! 

رەوش و گۆڕانکاریێن سیاسی ل  دەڤەرێ وەسا دخازیت ، کورد بھێز بۆ داھاتی خۆ بەرھەڤ بکەن و باشترین ھێز و  بەرھەڤی ژی  ئێکرێزیا ھێز و ئالیێن سیاسی یێن کوردستانێ و ئەنجامدانا چاکسازیێن بنەڕەتی و سەروەریکرنا یاسایێ و چەسپاندنا دادوەریێ یە . ھەرچەندە پرۆژێ حکومەتێ بۆ پشکەکا چاکسازیا ھاتیە پەسندکرن و گاڤێن چەسپاندنێ ھاتینە ھاڤێتن ، لێ جھێ دلخۆشیا خەلکی نینە و پرۆژەیەکێ نیڤ ڤەشارتی و لسەر خۆیە . 
چەسپاندنا بنەمایێن رێبازا بارزانی و ڤەگەریان بۆ دادوەریا سەردەمێ نەمر مستەفا بارزانی باشترین پرۆژە و پلانە بۆ دەربازبوونا ھەرێما کوردستانێ لڤێ قەیرانا ئابۆری و ئەنجامدانا چاکسازیا و نەھێلانا ڤالاھی و دووراتیا دناڤبەرا خەلکی و دەسھەلاتێ و ڤەگەریانا جڤاکێ کوردستانێ بۆ وی شیرازێ جڤاکیێ جوان و برایینی و ئاشتەواییی یێ بەری ب دەھان سالا .  
بڤان ھەلکەفتێن مەزن و دیرۆکی ( ڤەگەریانا بارزانی نەمر ل ئێکەتیا سۆفیەتا بەرێ ل ٦/١٠/١٩٥٨ و زڤراندنەڤا روفاتێن نەمران بارزانی و کاد ئدریسێ ھەردەم سالا ل شنۆیا رۆژھەلاتێ کوردستانێ بۆ بارزان ل ٦/١٠/١٩٩٣ ) ب دەنگەکێ بلند دبێژین بەلێ بۆ چەسپاندنا رێبازا بارزانی ، بەلێ بۆ برایینیێ و ئێکرێزیێ و دادوەریا لسەر دەمێ بارزانی نەمر .





ئەم هەواڵە 1366جار خوێندراوەتەوە
 
 
ڤیدیۆ گەلەری
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad