English | عربی | Kurdî دواهەواڵ
ڕاستەوخۆ  
 
دیرۆک لێڤەگەرا دروست دکەت و خیانەتکار خۆ دروست دکەن
2021-04-23 [01:45 AM]

نڤیسینا : غیاس خالد زێباری


لێڤەگەر و پێشەوا و رێبەرێن گەل و وەلاتا و شۆڕەش و بزاڤێن رزگاریخواز ب ھەڵویست و خەبات و خۆراگریا کەسایەتیان درۆست دبیت ، چونکی ئەو رۆلێ ئەکتیڤ و کاریگەر یێ وان رێبەر و پێشەوایان دبنە پشکەک ژ دیرۆکێ و دیرۆک بریارێ لسەر درۆستبوونا لێڤەگەرێن وان ددەت . سەرۆک مەسعوود بارزانی پشتی وەفاتا بارزانی نەمر، رێبەر و پێشەوا و سەرکردێ بزاڤا رزگاریخوازیا کوردستانی یە دەمی زێدەتر چل سالا ، ژبلی وان بیست سالێن پێشمەرگایەتی و سەرکردەکێ کارا و ئەکتیڤ و کاریگەر دناڤ سەنتەرێ شۆرەشا مەزنا ئیلۆنا و گوڵانا پێشکەفتنخواز دا ، وان سالان دا سەرۆک بارزانی ھەمی خاسلەتێن سەرۆک و رێبەریێ و پێشەوایەتیێ ل رێبەرێ ھەرە مەزن و بابێ دیرۆکی و کنیاتیێ گەلێ کورد مستەفا بارزانی وەرگرتینە . بارزانی نەمر ب سەرکردایەتیا خۆ یا دادوەرانە و شۆڕەشگێری و سیاسەتەکا دووربین و لێزان بۆ دابینکرن و ڤەگەراندنا ماف و داخازیێن ڕەوا یێن خەلکێ کوردستانێ و پاراستنا سنوور و جەگرافی و پیرۆزیێن کوردستانیا شەرەفا لێڤەگەرێ گەلێ کورد ل خەلکێ کوردستانێ وەرگرت وەکی لێڤەگەرێ ئێکێ و تەڤایا جیھانێ ژی پەسندا ڤێ چەندێ کر، چونکی تەڤایا جیھانێ ب دوست و لایەنگر و پشتەڤان و دوژمنێن گەلێ کورد بارزانی نەمر ب نوونەرێ خەلکێ کوردستانێ و بزاڤا رزگاریخوازیا کوردستانی ددیت و سەرەدەری لگەل دکر . دڤێرەدا دیار دبیت کۆ دیرۆکا خەبات و تێکۆشان و بەرخودانێ بریارێ لسەر دەست نیشانکرنا لێڤەگرێ مللەتی و وەلاتی ددەت و پێویستی ب ھەلبژاردن و راپرسیا نیە . سەرۆک مەسعوود بارزانی ژی ئەو سەرکردە و رێبەرێ گەلێ کوردە ئەوێ ھەمی ژیانا خۆ بۆ پاراستنا کوردستانێ و مافێن خەلکێ وێ تەرخان کری و دەمێ شێست سالایە دناڤ شۆرەشێن رزگاریخوازیا کوردستانی دا و دەمی ( ٤٢ ) سالایە پێشەوایەتیێ لێ دکەت . ئەڤ شێست سالێن خەباتا پێشمەرگاتی و سیاسی یا سەرۆک مەسعوود بارزانی بریار لسەر دەست نیشانکرنا جەنابێ وی وەکی لێڤەگەرێ سیاسی و جڤاکی یێ گەلێ کورد دایە ، چونکی لسەر دەستێ وی مەزنترین دەسکەفتێن نەتەوایەتی و نشتیمانی بۆ خەلکێ کوردستانێ بدەست ھاتینە و قەوارێ ھەرێما کوردستانێ ژی چوویە د چارچۆڤەکێ یاسایی و دەستووری دا و سازیێن نیڤ دەولەتی دانپێدان پێ کریە ، وەکی چەسپاندنا قەوارێ ھەرێما کوردستانێ دناڤ عیراقا فیدرال دا برەنگەکێ دەستووری ، چونکی پێداگیریا سەرۆک مەسعوود بارزانی نەبا عیراقا نوو یا پشتی رژێما بەعس قەوارێ ھەرێما کوردستانێ و فیدرالیەتا عیراقێ دا لسەر بنەمایێت دیرۆکی و جوگرافی نەدھاتە ئاڤاکرن ، بەلکی دا لسەر فیدرالیەتا پارێزگەھان بیت ئەوا ھندەک سیاسیێن کوردستانێ پەسەند کری ..! بەری ڤێ چەندێ ژی لدەسپێکا سالێن ھەشتێیان ل سەردێ بۆری ھەتا نھو ژبەر رۆل و کاریگەریا سەرۆک بارزانی ژلایێ شۆرەشگێری و سیاسی و دبلۆماسی جەنابێ وی وەکی لێڤەگەرێ گەلێ کورد ھاتیە نیاسین و سەرەدەری دگەل کرن ، وەکی سەرکردایەتیا بزاڤا رزگاریخوازیا کوردستانی و شۆرەشا کوردی و پاشان سەرۆکێ بەرەیێ کوردستانی و سەرپەرستێ سەرھەلدانا پیرۆزا سالا ١٩٩١ و دەسپێشخەرێ ئاڤاکرنا قەوارێ ھەرێما کوردستانێ لسەر بنەمایێن دیموکراستی و ھەلبژاردنا وی وەکی ئێکەم سەرۆکێ ھەرێما کوردستانێ و دانانا پەیوەندیێن دبلۆماسی یێن موکۆم لگەل جیھانێ ، ھەتا دگەھیتە بەرەڤانیکرن ل مافێن دەستووری یێن خەلکێ کوردستانێ د عیراقێ دا و شکاندنا ھەیمەنەتا تیرۆرستێن داعش و ھێرشێن میلیشیایێن چەند وەلاتێن ھەرێمی بۆ سەر ھەرێما کوردستانێ پشتی خیانەتا ١٦ ێ ئکتۆبەرا سالا ٢٠١٧ بمەرەما ژناڤبرنا قەوارێ ھەرێما کوردستانێ . ئەڤێ دیرۆکێ جەنابێ سەرۆک مەسعوود بارزانی کریە لێڤەگەرێ گەلێ کورد و جیھانێ ژی پەسەند کریە ، سەرەدان و کۆمبوونێن شاندێن بلندێن وەلاتان لگەل جەنابێ وی و وەرگرتنا رەئیا وی لسەر پرسێن سیاسی یێن کوردستانێ و عیراقێ دەڤەرێ بەلگەنە لسەر ڤێ چەندێ . دڤێرەدا تەکەز دکەینەڤە کۆ دیرۆک بریارێ لسەر دەستنیشانکرنا لێڤەگەرێن مللەتان ددەت ، لێ ئەوێن پشکەک ل چەندین ھەولێن خیانەتکاری دژی ماف و بەرژەوەند و ئارمانجێن گەلێ خۆ ب درێژاھیا دیرۆکێ بریار لسەر خیانەتکاریا خۆدایە و رەزامەندیا خەلکی وەرنەگرتیە , ھەر ئەو کەسن ئەوێن ئەڤرۆ پەیڤا لێڤەگەر ھەژی سەرۆک مەسعوود بارزانی نابینن . ئەڤەژی مافەکێ سرۆشتیێ خیانەتکارایە چونکی ب ھەول و خەبات و لێزانینا لێڤەگەرێ خەلکێ کوردستانێ سەرۆک مەسعوود بارزانی پیلانێن وان دھێنە ھەلوەشاندن و ئارمانجێن وان نەزۆک و بێ بەرھەم دبن .





ئەم هەواڵە 4219جار خوێندراوەتەوە
 
 
ڤیدیۆ گەلەری
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad