English | عربی | Kurdî دواهەواڵ
ڕاستەوخۆ  
 
حکومەتی هۆڵەندا داوا لە هاووڵاتییانی دەکات عێراق جێبهێڵن
2023-10-27 [11:25 AM]

ZNA- هەولێر


وەزارەتی دەرەوەی هۆڵەندا داوا لە هاووڵاتییانی دەکات عێراق جێبهێڵن و بۆ کاری پێویستیش نەبێت لە هەرێمی کوردستان نەمێننەوە.

 

رۆژی هەینی، 27-10-2023، وەزارەتی دەرەوەی هۆڵەندا هاووڵاتییانی خۆی ئاگادارکردەوە کە دەکرێت بەهۆی پێشهاتەکانی شەڕی نێوان ئیسرائیل و غەززەوە سەقامگیریی عێراق "بە خێرایی و زیاتر تێکبچێت."

 

لە راگەیێندراوەکەدا، وەزارەتی دەرەوەی هۆڵەندا، نەخشەی عێراقی بە رەنگی سوور پێشانداوە کە مەبەست لێی ئاستی هۆشداریی هەرە بەرزە و دژی سەردانیکردن یان مانەوە لەو ناوچانە ئامۆژگاری دەکات؛ هەروەها پارێزگەکانی هەولێر، دهۆک و سلێمانی و هەڵەبجەی هەرێمی کوردستانی بە رەنگی پرتەقاڵی پێشانداوە، بە واتەی ئەوەی کە مەترسییەکەی کەمترە، بەڵام ئامۆژگاریی هاووڵاتیانی دەکات بۆ کاری پێویست نەبێت لەوێش نەمێننەوە و عێراق بە تەواوی جێبهێڵن. 

 

وەزارەتی دەرەوەی هۆڵەندا باس لەوە دەکات، شەڕی نێوان حەماس و ئیسرائیل گرژییەکانی وڵاتەکانی دیکەی رۆژهەڵاتی نێوەڕاستی زیادکردووە؛ هۆشداریش دەدات لە مەترسیی دروستبوونی خۆپیشاندان بە دیاریکراویش لە شارە گەورەکان. 

 

پێشتر لە راگەیێندراوێکی هاوشێوەدا لە 22-10-2023، وەزارەتی دەرەوەی ئەمریکا بڵاویکردەوە، "داوا لە کارمەندە ناپێویستە حکومییەکانی وڵاتەکەمان و خێزانەکانیان لە عێراق دەکەین ئەو وڵاتە جێبهێڵن." 

 

هاوکات لەو راگەیەندراوەدا هاتبوو، "بەهۆی زیادبوونی مەترسی تیرۆر، رفاندن، گرژیی چەکداری و نائارامی لە عێراقدا مەترسی لەسەر هاووڵاتیان و بەرژەوەندییەکانی ئەمریکا لە عێراق هەیە."

 

وەزارەتی دەرەوەی ئەمریکا ئاماژەی بەوە کردبوو کە "لە عێراق هاووڵاتییە ئەمریکییەکان لەژێر مەترسی هێرش و رفاندندان، میلیشیاکانی دژە ئەمریکا هەڕەشە لە هاووڵاتییان و کۆمپانیا نێودەوڵەتییەکان دەکەن"؛ هەروەها ئاماژە بەوەش کرابوو کە خۆپیشاندان و ئاڵۆزییەکان تەواوی عێراقیان گرتووەتەوە و ئەگەری هەیە ئەو رووداوانە "بە خێرایی ببنەهۆی وەستاندنی هاتووچۆ، گواستنەوە و خزمەتگوزارییەکانی دیکە و تەنانەت بگەنە ئاستی تووندوتیژی."





ئەم هەواڵە 223جار خوێندراوەتەوە
 
 
ڤیدیۆ گەلەری
گۆلچی هامبۆرگ گۆلێكی ده‌گمه‌ن له‌ خۆی ده‌كات
گۆڵێكی سه‌یر له‌لایه‌ن گۆڵچیه‌وه‌
گڕكانی مایۆن له‌ فلپین
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad